Ydych chi wedi cwrdd â Fred eto? yn mynd ar daith ar draws De Cymru ym mis Chwefror a Mawrth

Mae Hijinx, mewn cydweithrediad â Blind Summit, yn cyflwyno eu sioe theatr gomedi newydd sbon Meet Fred fydd yn mynd ar daith ar draws De Cymru ym mis Chwefror a Mawrth. Mae’r sioe ddoniol, deimladwy hon, sy’n llawn chwerthin, yn cymysgu pypedwaith â pherfformiad byw gan gast o actorion sydd heb fod ag sydd ag anableddau dysgu. Cliciwch yma i weld yr hysbyslun. 

Manylion am Fred

Mae Fred yn foi digon cyffredin sy’n awyddus i ddod ymlaen mewn bywyd. Ei ddymuniad yw dod o hyd i swydd a setlo lawr gyda merch fach neis. Yr unig broblem yw mai pyped yw Fred, a dyna ble mae ei broblemau dibyniaeth yn dechrau. Mae bywyd bob dydd yn andros o galed pan fydd pob peth r’ych chi’n ei wneud yn dibynnu ar fod tri bachan arall gyda chi drwy’r amser.

Sioe gomedi theatr yw Meet Fred am ddieithryn sy’n ceisio gwneud ei farc mewn byd lle mae angen cryn dipyn o help arno. Yn y perfformiad ensemble llawn hwyl a sbri hwn a ddyfeisiwyd gan y Cwmni, seren y sioe yn ddi-os yw’r pyped clwt dwy droedfedd ei hun.

Yn ôl Cyfarwyddwr Artistig Hijinx, Ben Pettitt-Wade: “R’yn ni wedi cael llond trol o hwyl yn datblygu Meet Fred yn ystod y ddwy flynedd a mwy ddiwetha’, drwy fod wrthi’n chwarae â’r cysyniad o sut brofiad fyddai i byped fod yn byw bywyd bob dydd. Bu’r broses hon yn un ffantastig ac yn un a roddodd fod i gymeriad cofiadwy a pherfformiad fydd, gobeithio, yn cyffwrdd go iawn â’n cynulleidfaoedd. R’yn ni’n teimlo’n gyffrous felly am ein bod, o’r diwedd, yn gallu cyflwyno Cymru i Fred.” 

I gael diweddariadau rheolaidd am anturiaethau Fred cyn y daith, gallwch ddal i fyny ag e yn ‘Gwener Fred/Fred Fridays’ ym mis Chwefror – pan fydd Fred yn gyfrifol am Twitter@HijinxTheatre, ac ar Facebook drwy chwilio am ‘Hijinx Theatre’.  

Aelodau Academi Hijinx

Mae cast Meet Fred yn cynnwys actorion proffesiynol sydd ag anableddau dysgu ac sy’n hyfforddi yn Academi Hijinx yng Nghaerdydd, sef cwrs perfformio cyfredol i berfformwyr ag anableddau dysgu. Ers i’r Academi agor ei drysau yng Nghaerdydd am y tro cyntaf yn 2012, mae Hijinx wedi sefydlu tair Academi arall ym Mhrestatyn, Caerfyrddin a Chaerdydd, gydag Academi newydd i’w hagor yng Nghanolbarth Cymru yn 2016.

Dyma ddywedodd Richard Newnham, actor sy’n dioddef o syndrom Asperger ac sy’n aelod o gast Meet Fred“Mae bod yn aelod o gast Meet Fred wedi bod yn brofiad ffantastig. Pan fyddwch chi’n gweithio’n ddigon hir r’ych chi’n anghofio mai pyped yw Fred. Mae e’n actor sy’n bleser cydweithio ag e bob amser!”

Y Cynhyrchiad

Crëwyd Meet Fred gan Hijinx mewn cydweithrediad â’r arbenigwyr pypedwaith Blind Summit. Daeth Meet Fred i fodolaeth drwy gefnogaeth hael Cyngor Celfyddydau Cymru, The Esmée Fairbairn Foundation a The Rayne Foundation.

Gall cynulleidfaoedd o bob gallu dros 12 oed fwynhau Meet Fred.

Theatr Gynhwysol

Mae Hijinx, sy’n arloeswyr theatr gynhwysol, yn creu theatr lle mae actorion sydd heb ac sydd ag anableddau yn gweithio ochr yn ochr â’i gilydd fel partneriaid cydradd. Sefydlwyd y cwmni, sydd â’i bencadlys yng Nghaerdydd, dros 30 mlynedd yn ôl ac mae wedi bod yn mynd â sioeau integredig ar daith - gyda chastiau o actorion sydd heb ac sydd ag anableddau dysgu - ers 2006.

Mae cast Meet Fred yn cynnwys dau actor â syndrom Asperger ac un â Syndrom Down, sy’n gweithio fel cydraddolion ochr yn ochr â phedwar actor sydd heb anableddau dysgu.

I gael mwy o wybodaeth, lluniau ymarferion, cyfweliadau neu docynnau’r wasg, cysylltwch os gwelwch yn dda â Zoe King yn Hijinx ar 02920 300331 neu zoe.king@hijinx.org.uk

Taflen Amser y Daith a Bwcio

The Miners’, Rhydaman 26 Chwefror 19.30 – ffôn 0845 226 3510

Redhouse, Merthyr Tudful 27 Chwefror 14.00 - ffôn 01685 384 111

Canolfan y Celfyddydau Pontadawe 29 Chwefror 13.00 a 19.00 – ffôn 01792 863722

Sefydliad y Glowyr, Coed Duon 2 Mawrth 19.30 - ffôn 01495 227206

 Canolfan Gelfyddydau Chapter, Caerdydd 3 Mawrth 13.30 a 19.30 – ffôn 029 2030 4400

Theatr y Torch, Hwlffordd 8 Mawrth 19.45 - ffôn 01646 695267

Park a Dare, Treorci 9 Mawrth 13.00 – ffôn 08000 147 111


Newyddion Diweddaraf
Theatr Hijinx ym Maes Awyr Caerdydd diolch i ganfed buddsoddiad Celfyddydau & Busnes Cymru

Mae menter a fydd yn gweld staff ym Maes Awyr Caerdydd yn cael eu hyfforddi gan actorion sydd ag anableddau dysgu er mwyn datblygu eu sgiliau cyfathrebu yw'r canfed prosiect i elwa o chwistrelliad o arian gan raglen CultureStep Celfyddydau & Busnes (C&B) Cymru.

Darllen rhagor
Llwyddiant elusen theatr Cymraeg gydag arloesi prosiect anabledd dysgu yn Lesotho

Cymerodd y cwmni theatr Hijinx, grŵp o actorion a staff anabl dysgu ar daith ar hyd Lesotho rhwng y 10-25 Chwefror, gyda phrosiect perfformiad o'r enw Able to Act.

Darllen rhagor
Elusen theatr Gymreig yn lansio prosiect anableddau dysgu arloesol yn Lesotho

Mae'r cwmni theatre Hijinx yn cymryd grŵp o actorion a staff dysgu i fynd ar daith yng nghefn gwlad Lesotho rhwng 10 a 25 Chwefror, mewn prosiect perfformio arloesol o'r enw Able to Act.

Darllen rhagor